Art. 1 - INOM

Le cor moscedè dla Cöra da Corvara, consacrada al Sacher Cör de Gejú, é na assoziaziun volontara de ëi y ëres y á inom „Ciantarins da Corvara".

Art. 2 - FUNZIUN

Chësc cor se dá jö y promöi la musiga de dlijia tl sentimënt y spirit dles diretives dla dlijia. Dal momënt che süa ativité é n sorvisc liturgich, dess le comportamënt de düc i componënc ester d’ejëmpl por la comunité.
Al surantol, dô acordanza cun le ploán, le ciantè pro les festes liturgiches.
Le cor se da jö y promöi ince la musiga profana. Al pò tó pert a manifestaziuns culturales o ester instës promotur de de te’ manifestaziuns.
La musiga de dlijia á la priorité.

Art. 3 - COMPIC

• a.) Tl ciamp dla musiga de dlijia se crüziel
  
• • 1. de to le coral gregorian sciöche ejëmpl dla musiga de dlijia
  • 2. dla polifonía vocala classica y la musiga da dlijia contemporana;
  • 3. dla ciantia de dlijia ti trëi lingac provinziai;
  • 4. dla musiga strumentala, tan inant che al é pormetü dal Ordinariat, sciöche acompagnamënt al ciantè dl cor mo ince sciöche cornisc musicala dla liturgía, y dles funziuns nia liturgiches.
• b.) Tl ciamp dla musiga profana se crüzia le cor dla musiga profana por cors en general, sides dl ciantè che ince dla musiga strumentala.

Art. 4 - MESI

Sciöche mesi por l’arjunjimënt y la dërta esecuziun di compic suradic ôl ester na formaziun musicala y liturgica di componënc y n aprofondimënt religius, por che so ciantè sides n perié sinzíer y n contribut prezius por la vita culturala dl paîsc. Chësc vëgn a s’le dè dantadöt te proes regolares y te cursc desvalis.

Art. 5 - COMPONËNC

Le cor de dlijia Ciantarins da Corvara é metü adöm da praticanc y da mëmbri d’onur. Sciöche praticanc pol gní tut sö ëi y ëres cun les carateristiches nezesciares, che pò gní ejaminades dal dirighënt dl cor pro les assunziuns nöies.

Art. 6 - ADEJIUN

Anunzies por assunziuns vëgn fates por scrit o ince a usc pro le dirighënt dl cor o pro le presidënt dl cor. Le presidënt o le dirighënt porta les anunzies a conescënza di componënc dl cor. Le dirighënt dl cor, deboriada cun la surastanza, tol la dezijiun sön l’assunziun.

Art. 7 - DEMISCIUN

Detlaraziuns de demisciun é da comuniché al presidënt - por scrit o a usc, cun indicaziun dl gauja - che deboriada cun la surastanza tôl na dezijiun che é tl interés dl cor. Le presidënt informëia tan bëgn la surastanza che ince i componënc dla demisciun.

Art. 8 - ESTLUJIUN

Componënc, che tres so comportamënt sides al intern dl cor, che ince defora, porta le cor al dann o al dejonur, pò, tres na dezijiun dla surastanza, gní stüc fora dl cor.

Art. 9 - DOVËIS

I componënc se obliëia - tl limit dl poscibl - a to pert regolarmënter y puntualmënter ales proes de ciantè y ales manifestaziuns dl cor basades sön dezijiuns dla surastanza.
Ëi se obliëia a sotstè ales ordinanzes dl dirighënt dl cor y dla surastanza. Vigni mëmber dess porvè de dè le poscibl por l’ativité dl cor.
Sön les assënzes pro les proes y rapresentaziun él da avisé le dirighënt dl cor.

Art. 10 - PROPRIETÉ DL COR

Döt le material da notes, sciöche ince possesciuns y aredamënt (aladô dl inventar) resta de proprieté dl cor y vëgn tignis sö tl local dl cor te dlijia o tl local dla proa dl cor de dlijia.
La surastanza é autorisada - tres na ressoluziun relativa - a vëne material che ne vëgn nia adorà.
Tl caje che le cor va indalater, vëgn la proprieté dl cor confidada ala cöra, cina che le cor vëgn indô metü sö.

Art. 11 - AMINISTRAZIUN

Chisc componënc mët adöm la surastanza dl cor:

• 1. le ploán
• 2. le dirighënt dl cor
• 3. l’orghelist
• 4. le presidënt
• 5. le vizepresidënt
• 6. le cassíer
• 7. le scrivan

Le ploán, le dirighënt y l’orghelist é ofizialmënter mëmbri dla surastanza.
Sce al ess da ester dui o deplü dirighënc o orghelisc, spo vëgnel fat na lîta dala sentada por to íte chësta inciaria.
Le dirighënt dl cor tol ince íte l’inciaria de responsabl por les notes.
I atri mëmbri dla surastanza vëgn litá pro la sentada generala tres lîta socrëta y resta en ciaria por trëi agn y pò indô gní litá danü.

Art. 12 - LA SURASTANZA

Compic dla surastanza

La surastanza vëgn cherdada íte dal presidënt, tan de iadi che ël l’arata nezesciar y al é tl medem tëmp n dovëi cherdè íte vigni trimester na sentada dla surastanza. La surastanza á competënza dezijionala sce le presidënt o le vizepresidënt y almanco le mez de düc i mëmbri é presënc (presidënt + 3 de d’atri mëmbri dla surastanza). Les dezijiuns vëgn tutes a maioranza de usc di mëmbri presënc. Sce al vëgn a s’le dè na parité d’usc, spo é la usc dl presidënt chëra dezisiva. Döta la surastanza á le compit de to chëres dezijiuns che ti é d’ütl ala natöra, le fin y la funziun dl cor y mëss ince se cruzié de na buna armonía danter i mëmbri. Dantadöt ti spétel chisc dovëis:

• a.) porvè de cherié na buna armonia al intern dl cor;
• b.) le control sön la frecuentaziun dles proves y manifestaziuns;
• c.) la consulënza por ci che reverda i dovëis y les manifestaziuns culturales laurades fora dal dirighënt;
• d.) la propaganda por le cor y le fistide di jogn che vëgn docá;
• e.) i finanziamënc por le laûr dl cor.

Compic di mëmbri dla surastanza

Le ploán: ël controlëia les bríes y i laûrs dl cors, tan inant che chëstes reverda le ciantè te dlijia. Ël á le dovëi dl’assistënza religiosa dl cor. Ël fistidiëia de mëte a desposiziun i mesi nezesciars por l’eserzize dl sorvisc liturgich. Ël fej fòra cun le dirighënt y le presidënt la funziun dl cor. Ël fej propaganda por le cor de dlijia, alzan fòra süa posiziun particolara tla comunité.

Le dirighënt: Ël é responsabl por l’assistënza artistica dl cor, por le program dles festes liturgiches, por les manifestaziuns nia liturgiches y por les rapresentaziuns dl cor pro manifestaziuns culturales fora dla dlijia.
Ël ejaminëia l’assunziun de componënc por ci che reverda süa cualité musicala. Ël se crüzia dles notes dl cor y tëgn na lista dles presënzes de düc i mëmbri. Ël ciara sura l’ativité dl cor y é responsabl devers dl ploán por ci che reverda le program musical de dlijia. Ël fej propaganda por le cor, y se crüzia, deboriada cun la surastanza, di jogn che vëgn docá.

Le presidënt: Le presidënt é cherdè a rapresentè le cor internamënter y ince publicamënter; ël á la presidënza tla sentada generala y tla surastanza. Düc i scric che vëgn dá fòra dal cor mëss avëi süa firma. Le presidënt é autorisé a pié dô y paié fòra contribuc y sovenziuns a d’atres istitutziuns. Ël é responsabl por l’òrdin intern dl cor y sostëgn i laûrs dl dirighënt. Ël á le control sön la frecuentaziun dles proes, pro de apajè stritaríes danter i componënc y ti recorda al dirighënt fac importanc. Al controlëia la gestiun finanziara y fej propaganda, deboriada cun le dirighënt y la surastanza, por i jogn che vëgn docá.

Le vizepresidënt: Ël sostituësc le presidënt tl caje de impedimënt.

Le cassíer: Ël é aministradú di scioldi dl cor. Ël tëgn i libri de contabilité y porta dant le cunt consuntîf pro la sentada generala anuala. Por chestiuns finanziares ál le dërt de sotescriziun.

Le scrivan: Ël á le dovëi de fa düc i laûrs scric che reverda le cor. Ël tëgn le protocol pro les sentades, pro la sentada generala anuala y scrí la cronica dl cor. Implü mëssel tigní n schedar de düc i componënc. Le scrivan se crüzia de inserac ti foliec, apostëia programs de rapresentaziun, tan inant che ai se vëgn damaná. Ël se crüzia dl reclam tres n’ativité autonoma.

Art. 13 - I MËMBRI D’ONUR

Pro la sentada generala anuala vëgnel deliberé sön la comembranza d’onur, che ti vëgn data a mëmbri che é sta por 50 agn alalungia zënza interuziun pro le cor. Te chësta ocajiun ti vëgnel sorandè na onoranza de S. Zäzilia y n dipolm d’onur, cun chël che le mëmber en chestiun vëgn tut sö pro i mëmbri d’onur.
De d’atres onoranzes ti vëgnel dè a chisc mëmbri:

• - dô 10 agn d’ativité medaia y atestat
• - dô 25 agn d’ativité medaia d’arjënt y atestat
• - dô 40 agn d’ativité medaia d’or y atestat

Art. 14 - RAPRESENTAZIUNS

- Le cor cianta en ocajiun de dötes les festes liturgiches, acordades denant cun le ploán;
- pro sopoltöres (sciöche la tradiziun ô) sce al röia adöm ciantarins assá. Na dezijiun alternativa pò gní tuta dal dirighënt tl caje che al é püc ciantarins;
- pro nozes, sce al se vëgn damanè espressamënter le cor de dlijia;
- pro manifestaziuns culturales, che vëgn fates fora dala surastanza.

Art. 15 - SENTADA GENERALA ANUALA

La sentada generala anuala mëss gní cherdada íte dal presidënt por scrit y cun notificaziun dl òrdin dl dé. Termînn y post dla sentada vëgn fac fòra dala surastanza y comunicá denant por scrit ai componënc.
Na sentada generala straordinara vëgn cherdada íte, sce almanco 1/3 di componënc s’la ghira por scrit injuntan les gaujes.

Art. 16 - REGOLAMËNT PRO LA SENTADA GENERALA

1. Letöra dl protocol dl’ultima sentada generala anuala;
2. Relaziun anuala da pert dl dirighënt y dl presidënt;
3. Nomina de dui revisurs di cunc;
4. Relaziun da pert dl cassíer sön la situaziun dla cassa;
5. Aprovaziun resocunt dl cassíer da pert di revisurs di cunc;
6. Da caje a caje - Nomina di compëdausc
7. Da caje a caje - Lîta di mëmbri dla surastanza (ciara: prozedöra de lîta)

Art. 17 - COMPETËNZA DEZIJIONALA

La competënza dezijionala dla sentada generala é dada dala presënza de 50% + 1 di componënc atîfs. Les deliberaziuns vëgn tutes a maioranza dles usc dades jö. Les usc pò ince gní dades jö por alzada de man (tut fòra les lîtes), sce chësc vëgn ghiré da n componënt dla sentada generala y sce degügn ne n’é decuntra.

Art. 18 - DESLIAZIUN DL COR

Sce al ne foss - por rajuns inevitables - nia plü poscibl tigní adöm le cor, spo pò la sentada generala deliberé de lascè sö l’ativité. L’inventar dl cor vëgn aministré dal consëi de cöra cina che le cor vëgn metü sö danü.
L’inventar pò mâ gní venü cun l’aprovaziun de 2/3 dla maioranza dl comitê. Le davagn resta al cor.

Art. 19 - MUDAZIUN DL STATUT

Chisc statuc ti vëgn presentá ala sentada generala y vëgn aprová a maioranza. Mudaziuns pò mâ gní fates dala sentada generala.

PROZEDÖRA DE LÎTA DL COR DE DLIJIA

Art. 1 - DESPOSIZIUNS GENERALES

La lîta dla surastanza dl cor de dlijia vëgn fata vigni 3 agn dala sentada anuala. Le termînn por la lîta y le post vëgn fissá dala surastanza y mëss gní comunicá por scrit a düc i componënc y al presidënt. Al vêl chëstes desposiziuns:
a.) mâ mëmbri efetîfs dl cor de dlijia á le dërt de lité;
b.) la lîta mëss ester socrëta;
c.) les lîtes vëgn mâ fates sce al é la competënza dezijionala aladô dl Art. 17;
d.) cina dô les lîtes él le presidënt da denant che manajëia l’andamënt dles lîtes;
e.) dan les lîtes vëgnel chirí fòra, sön proposta dl presidënt y tres alzada de man, dui compëdausc.

Art. 2 - PROZEDÖRA DE LÎTA

La sentada generala lîta chisc mëmbri dla surastanza:
1. Le presidënt
2. Le vizepresidënt
3. Le cassíer
4. Le scrivan
Sce al ess da ester dui o deplü dirighënc o orghelisc, vëgnel ince lité por chësta inciara.
I mëmbri dla surastanza vëgn litá cun la maioranza relativa. Tl caje de parité de usc, vëgnel fat na lîta danter i candidac.
Sce un ne n’é nia a öna de azetè l’inciaria, spo vëgnel tut chël, che sciöche proscim á ciafè plü usc. Sce n mëmber dla surastanza se retira tratan la dorada dl mandat, vëgnel tut le proscim che á ciafè plü usc.