Ciantarins da Corvara

Picera storia de nosc cor

I "Ciantarins da Corvara" mët raîsc tl mëis de furá dl 1963 sciöche cor de ëi.
L'ativité ciafa n bun scomanciamënt söt ala bachëta de Jan Willeit y ala surastanza de Rudi Granruaz. Plö tert se muscëda l'cor cun l'tó ite ince ëles.
Sciöche vigni uniun á ince i Ciantarins da Corvara albü momënc da fà saurí y atri n pü plö dala stënta. Dl ann 1996 an manacè de dè sö l'ativité. Giulan a valgünes porsones y sambëgn ala gran pasciun por l'ciantè, che é da dagnëra stada dër via, ne esun por fortünia nia rová a tan.
Atualmënter é la direziun dl cor tles mans de Franco Pizzinini da La Ila. La surastanta é Serena Foppa.
I Ciantarins da Corvara, che é dandadüt cor de dlijia, arcompëda indüt 29 mëmbri, 9 Soprans, 5 Alt, 8 Tenors e 7 Bas.
Al vëgn ciantè dales gran festes de dlijia y abelí canche mai les funziuns religioses, mo canche ala se porta pro, cianta i Ciantarins dër gian ince cianties dla bona lüna. Dainré se tiri zeruch canche ai vëgn inviá a festes o recorënzes.
Bel dl 1998 se á i Ciantarins presentè al "Dé dla ciantia ladina" y dl 2000 el gnü azetè l'invit de n cor da Cuera, tl Cantun Grijun dla Svizra, por festejè deboriada i 25 agn de fondaziun. Por düc é chësta stada na esperiënza dër interessanta.
(da ValbadiaOnline)

Co che ala av metü man inlaota

A Corvara èl gnü metü man tert cun l ciantè pur latin y a de plö usc. Impormò l'ann 1933 an purvè da scomencè y cun forzes che gnê plötosc da foradeca. Dal 1935 insö ruvâ da Badia sö i maestri Maria y Eusebio Pescollderungg, can un, can l'ater les sabedes y domënies a insignè y sunè l'armonio. Maria acompagnâ la mëssa les festes. Ai è ruvà sön 16 ciantadus. Maria ê plö bagn udüda co so om, dea che ala ê manco zitia. Eusebio urô avëi les cosses plö avisa. Mo l cor tignô bel adüm y ciantâ cun gran ligrëza y düc ê cuntënc.

Plötert sunâ pur zirca 15 agn Hilda Kostner sot a la direziun de Carlo Glira. De sigü savô chësc da se tó la jënt.
A Corvara el spo gnü fat la dlijia nöia y bel denant èl ste Jan Willeit da La Plí che è ruve a Corvara a laurè te Cumun, che á metü sö dër n bun cor. Ai á metü man da ciantè de vigni sort de bel patüc te dlijia y ince fora de dlijia y l cor gnê três plö cunescü. Tla dlijia nöia el spo gnü cumprè dër n bel orghe nü y l cor cianta de beles mësses y d'atres beles cianties a unur de Dî y ligrëza dla jënt da Corvara.